IT人，你們醒未呀？

早兩日同個朋友chat，從佢口中得知原來幾個熟悉我的朋友都擔心我。其實我真係唔知，亦唔想令佢地擔心。其實冇野做唔等於需要擔心呢，我又唔係未試過辭工唔做，況且我都未盡力去搵工，我仍然係懶懶閒咁。

因為我metal上實在有d攰，所以仍然未決定自己是否再需要去搵一份長工。今次既metal 攰同上一次有d唔同，上一次係因為工作量大，舊公司又成日遲出糧。今次係因為對於自己果一行睇到好淡，準確d講我係唔甘心。其實唔做呢一份工之前，我都有不停咁搵工、send email 求職同interview，不過越搵工，個心越寒，人人都話依家市道好番好多，但係點解我見到有雇主出五千大元去請programmer呢？係呀，我一畢業就做programmer，fresh grad.出黎果一陣已經有差唔多九千，最高峰更試過有十幾k添。五千蚊？似乎多過d賓賓唔係好多，但工作量，所要求要有既skill set 肯定比做家庭傭工多。點解人工不升反跌，原因簡單到極，就好似我讀U時既老本行（製造工程）一樣，工序北移。咁香港既雇員唔係俾人炒就係減人工喇。

如果我能力不濟被人淘汰我冇話可說，不過如果係因為我人工唔夠人平呢，我條氣就點都唔順，自問自己從少就愛上電腦，兼且對programming 有小小天份，可以好快上手，但偏偏輸在人工貴。唉！在此先勸有心想入IT 界既人三思呀！

我依家只可以睇到整個IT行業，仍然站得住腳的就只有高高在上的management同做得多、鬧得多、但賺得少既support。至於programmer？算喇老友，轉行可能仲有機會，小弟就正向創立自己既事業呢一個方向進發。