九月十七日又開心又疲倦的一日

連日來的天氣不穩定到星期日終於都天公做美，陽光普照。一家大細一早起身去到西貢，目的就係想離開煩囂的市區去過一個寧靜又舒服的假期。計埋細佬的朋友，一行十八人與及九隻大大小小的狗隻，還有大量的浮床水泡，準時九點半到達西貢碼頭搭遊艇出海。

其他出海人士所租的遊艇已經付有小型快艇，可以方便用家隨時登岸。


沿途風景的確不錯，能夠離開市區，心情都自然好起來。


大概半個多小時既航程就到達目的地–南峰灣。當遊艇在海中心停下來的時間，其中一些狗主已經急不及待的將其小狗登上吹氣浮床，慢慢的朝杳無人煙的小沙灘進發。

當日的水流十分急，如果自己一人加一個浮床或水泡，勉強也可以游幾百米上沙灘。但當時有數人不太熟水性，所以這一位沿途跟著我們的艇家就大派用場。俾了大概$200，就可以任意乘搭來回遊艇與小沙灘。

在船尾游了十多二十分鐘後，發現無可能游埋沙灘，於是就登上小艇，向著沙灘進發。一分鐘也不到的船程，我們就已經到達水清沙幻的南峰灣小沙灘。令我喜出望外的是，香港竟然仲可以搵到一個咁清潔，沙粒咁幼，海水咁清澈既地方，實在難得。當然，比起澳洲的Cairns及Gold Coast的海灘仲有一段距離，但能夠在香港也有咁樣水準，簡單係尋到寶一樣。

由於不便帶相機及電子儀器的關係，不能提供沙灘上的照片囉，唔好意思。

一路玩到一點，回遊艇稍作休息及食lunch後，又再回到沙灘。不過發現了一個事實，就是今次的出海，可能是今年的最後一次了，因為烈日當空的下午，只要一上水就會覺得有涼意啦，希望好快就會再有下次的出海就好喇。


經過人有人玩、狗有狗玩、人同狗玩既一整個下午，帶著疲倦的身軀，回到遊艇上，收拾行裝，準備回程了。回程一路上，見到大大小小遊艇一同浩浩蕩蕩的返回西貢碼頭，真係「東華」一樣的陣容。


返到市區並不代表今天的行程到此為止，還有一早book 定的兩個小時羽毛球活動。已經消耗了大半體力的我，終於明白到足球員在踢加時的時候有多辛苦。體力下降令反應及運動節奏都變亂了，明明可以打中的球也會打中板邊，明明可以救回的球也會因動作慢了而遲了一步。唯一可幸的是經過連續數星期的練習，已大大有進步了。捱了整整兩個小時的羽毛球運動，回到家，沖了一個熱水涼，已經是差不多開波了，當時係MU對Arsenal，但我已攰到無法再為MU打氣了。結果當然係MU輸了啦，激鬼氣！估唔到一日既結束係睇住MU輸波而回！