Day 5 四月二十二日 晴 (沼田、草津)

晨咁早就要起身，趕火車去沼田 (Numata)，因為我地book 左一早就食士多啤梨放題，新鮮擇，新鮮食，正喎。我諗今年食士多啤梨既quota 已經用盡，因為我好似食左成20粒喎，仲要粒粒都咁大粒。

兩pack 都係800 yen，你話香港賣幾貴喇。

食完就梗係周圍行下，影下相，睇下有咩野可以買走喇。原來呢度都有櫻花，不過睇個款，似係種黎賣俾人喇。

影完相出返去，士多啤梨園既婆婆原來已經準備好D小食俾我地試，仲話有免費咖啡茶添，不過我地唔貪心，淨係食左一件餅同飲清水得喇，廢事俾D壞印象日本人，

其實我地同自由人真係好唔同架，我地守規矩好多架。^_^

食完準備走之際先發覺個巴士時間表唔夾我地離開既時間，冇計喇，唯有叫的士，婆婆仲好好人咁幫我地叫埋車送埋我地走。


坐車去到火車站，係時候起程去草津 (Kusatsu)囉。Kevin 話草津係日本三大溫泉區之一，好出名架，一場黎到，一定要見識見識。

不過當我地到達原草津口火車站後，準備買巴士飛時，『梅菲人』又再出現。整架列車落車既所以人都係同一個目的地，草津溫泉街。

自不然人人都要買巴士飛喇，Kevin of course 會幫我地排隊買埋喇，但係人人入紙幣落部售票機都冇事，一到Kevin 就唔得，唔係一張兩張紙幣唔得，係張張都唔得。

最麻煩係，我地11:34落車，11:37巴士就開喇，miss 左呢一班，要等好耐啊。結果Kevin 再售票機前大發雷霆。有個好心日本人幫手入紙幣，咦！好似得喎，

但係一到Kevin 自己入，又係唔得，仲要有個唔知係巴士佬定係站長既日本阿叔係度「阿支阿助」，如果唔係唔識日文，實走埋去幫拖同佢死過。

結果搞左一輪真係買晒飛喇，不過架express 既巴士開左唔等，我地唯有坐頭先嘈嘈閉果個阿叔果架喇，不過係慢車者。

坐左一陣就到，一落車已經聞到好強烈既臭蛋味(硫化物)，沿途既建築物古色古香。我不其然諗，如果唔係Kevin 帶，我根本冇可能黎到呢D地方。Kevin，係呢度真係要thank you 你呢。



由於行李眾多，索性係車站入面間食店食埋個lunch 先繼續行程。


終於可以解禁喇，我叫左我最鐘意食既炸物，海鮮天婦羅呀。

食完就背一件行李，拖埋Fiona 加自己個hand carry，行左三個字到就見到地標喇。一個好有型格既溫泉公園，地方唔大，不過整得幾好睇喎。「粗身大細」既我地暫且不停留，快手去到酒店check-in 先。

盛惠每位16000 yen 喇, 一晚酒店加懷石料理。



上到房先覺得，抵喎。首先間房四平八穩，有個可以抖涼既露台，唔係香港果D size，人地大好多，坐幾個人都仲有位淨。

食同瞓都係同一個位，足夠放四至五個被舖，有個32吋既LCD TV同DVD player。有一間房for relax only，有按摩椅架，仲有第二個LCD TV 添。


擺低晒D負累，梗係去行街街，影相喇。


去返頭先經過既溫泉公園，影下相睇下，幫襯附近間燒物，我終於食到燒雞潤喇，yummy yummy。

行到咁上下，就要返酒店囉，因為人地係預你六點鐘開飯。食完落去浸溫泉架。要體驗日本人既生活，梗係跟足喇。



呢餐係點，我就唔講喇，自己睇相。^_^

食完做咩，出去行下幫助消化，然後先去浸溫泉喇，我食左兩大碗飯架。

浸溫泉果D野就唔使講喇，梗係香艷喇，我同Kevin 肉帛相見喎。Sorry，不過照片欠奉，因為我肯D 日本老人都唔肯。^_^

浸完就返房執野，預備Day 6 既行程喇。