Day 3 四月二十日 陰/晴 (原宿、輕井澤、舊．輕井澤)

六日Trip 之中，最遲起身既一日，八點正起身。執埋野搞完一輪，九點正酒店lobby 集合，先同Kevin 辦好check-out 手續就拖住D行李先返去東京站放低大型行李入locker，因為我同Fiona 都唔會再返池袋喇。去到東京站，租左兩個locker，放低D行李就去原宿(Harajuku) shopping 兼食好味拉麵。

題外話，如果香港D鐵路都學人整呢D locker，我諗日日都有人報警唔見野都似，日本仔既自律性真係不得不讚。

原宿不愧為潮人地方，衣著裝扮同其他東京地方真係差得遠，如果夜晚行，你會以為不停撞鬼添。

朝早主要目的都係shopping，原來好多0101 已經執左喇。So Bad!

行左成朝，得Fiona 有少少收鑊，我地就得個睇字。行完就梗係去食好野喇。

Kevin 重點推介，味源拉麵，是也！








































我同Kevin 一人一碗大拉麵，都係1000 yen，細都要800 架，不過個湯同麵都好好食，仲有溫泉蛋喇，喂糖心架大佬，仲有就係100 yen 五隻既餃子。


嘿，返到香港各位唔使再約我食拉麵喇，應該食唔到呢個價錢都仲咁鬼好食。

食完做咩？？行一陣就要撲返東京站搭長野新幹線上輕井澤喇，有一個鐘可以休息下喇。














到達輕井澤，整個人都輕鬆晒喇，歐陸式既design，一望無際既風景，超大既outlet，I miss you so much 輕井澤。




Kevin 伉儷先陪我同Fiona 去阿婆酒店 (Apa Hotel) check-in，原來阿婆好出名架，日本好多地方都有佢既酒店，不過佢副尊容呢，我個人認為似小甜甜囉。

之後就到佢地去民宿，聽聞話日皇都會去住喎，勁！一入門口就有個似西人既日本人講唔知英文定廣東話歡迎我地，跟住帶左我地上房擺低行李，然後我地就出去outlet 附近既Nissan 車場攞車喇。

嘿，有車牌識日文都唔一定係有咩著數，Kevin 用左好耐先可以駕馭到架七日車。BTW，日本入油平好多喎，如果下次Kevin 唔介意，不如全程你揸車喇，最多我夾番油錢，咁就唔使迫火車。^_^


有車後既第一站就係上次都有去既雲場池，不過上次感覺震撼好多，因為上次係整個眼見個地方都係紅葉，今次個景都好，不過冇上次咁正。



之後我地去左舊輕井澤，呢度都唔錯喎，好多店舖我地都有行，買左唔少手信同食物，不過奇在，我地行完每一間，轉個頭佢就關門架喇，好似等埋我地行完先敢收舖咁。



好，finally 去左中輕井澤食放題，用豆漿打邊爐，都係第一次，不過真係幾好味都幾抵，1680 yen 一位咋。

食完捧住個肚，梗係返去瞓喇，因為輕井澤夜晚係冇野行架。

Day 2 四月十九日 陰/雨 (涉谷、芝公園、築地、台場、池袋)

準時六點半起身，七點到達Kevin 伉儷房間集合，等兩位主角裝好身就準備忙碌的一日。有邊個會知道原來『梅菲人』會跟埋黎架。




搭山手去到涉谷 (Shibuya)明治神宮，原本諗住可以影到門口個大鳥居，結果門口個疑似食蕉話唔准用腳架，我地草草影左幾張相後就行入去，希望入到去冇人就阻頭阻勢。

一路入去都冇乜特別，係撞到一班外國人，由於Ronnie 已經換左婚紗，D鬼真係好熱情，個個都爭住要同呢對新人合照，其中一個鬼佬好似Mr. Bean 架。







好在入到神宮中段，見到一個規模細少少既鳥居，但係因為天氣尚可，背景又好，我地影左好多相先走呀。







係時候起程到下一站 – 芝公園 (Shiba Park)。根據Kevin 既資料搜集，芝公園既有櫻花，又可以影到東京鐵塔。結果不負所望，一去到就見到一棵唔細既櫻花。我地瘋狂咁影左一輪相之後，再轉一轉個陣地去影公園內其他景，如果我地知道兩日後會見到更多櫻花，肯定唔會咁失控。

The Next Station is Tsukiji Market. 去到築地，可以影相既地方唔多，反而係搵食既好時機，我地食左個好好味既燒帶子喇、蟶子喇。仲有中左計既燒魚潤喇，我同Kevin 一食落口就即刻大叫Shit，都唔記得個老闆就係企左我地面前，因為真係好腥呀，其實我地係想買燒雞潤架，too bad！






































食完小食，又搵唔到平既水果買，我地提早入台場 (Odaiba)喇。


























台場出名D乜，彩虹橋、摩天輪、富士電視台、Shopping Mall 同美食囉。去到JR 新橋搭高架鐵路就可以去到台場喇，原本諗住會來來回回影相，我地又買左1-day pass。



















BTW，我地發神經，早左一個站落車，結果要行幾分鐘既路去台場。趁天色未晚，又冇落雨，拿拿臨叫Ronnie 去換衫，我地先影一輪以白天彩虹橋為background 既相。嘿，好在有影，唔係就麻煩喇，原來『梅菲人』整日都跟住我地呀

影左一輪，大家都有D攰就返入去shopping mall 行一陣，食左個好味既tea。食完又行，結果未到天黑，我地四人都攰到唔識形容，雙腳都好似注滿水銀咁，舉步維艱。

好不容易先捱到入黑，準備影台場夜景之際，『梅菲人』正式現身。落大雨呀！Fxxk！

Set 好腳架，試左一輪，失敗再試，試完又失敗，相機盡濕，鏡頭盡濕，那邊箱抹乾鏡頭對焦，轉個頭又俾雨打濕。難為換好衫的Ronnie 在乾等，因為下著雨的東京實在係凍。Sorry 呀，My Friend.最尾就梗係『梅菲人』贏喇。我地一幅都影得唔好，I mean 人+景喎, 淨係景又冇問題，你話激唔激死。














結果Kevin 建議臨時換景，去一個有藍燈背景既有蓋地方，影左一堆相後就回程返池袋換衫，去準備食美味和牛。由於晚飯當晚已經delay 到十時，小弟身心俱疲，晚飯時間已經放低相機在房內烘乾，當晚晚飯照片會由Fiona 提供，謝謝。

(食物照片後補)

Day 1 四月十八日 陰 (香港 --> 東京)

晨早五點半起身，簡單梳洗過就仆落樓，手拖一件、背起一個行李，行成十分鐘去搭E22。好在途中撞到做完晨運返黎既老豆老母，佢地都幫拖拖左一陣。

等左唔夠五分鐘就有車黎，開頭諗住上左車可以瞓一陣，因為前一晚執完野都三點，你話瞓左有幾多喇，結果都係唔敢瞓，因為架E22 總站係赤臘角碼頭，過左龍就大鑊。

好在沿途仲有隻大蚊幫幫我，唔係我實瞓著。

到左機場已經差唔多七點三，等左一陣Kevin 伉儷同Fiona 都到達，結果我地快快手去左check-in 之後就入禁區嘆早餐，開頭以為真係可以嘆架，結果又係匆忙咁食完就排隊登機，因為Kevin 伉儷既hand carry 實在體積龐大，要晨早上機霸行李架。

上到機以為終於可以瞓幾個鐘到日本，點知係惡夢既開始，唔知係唔夠瞓定係國泰架機唔乾淨，我同Kevin 一上機冇幾耐就開始鼻敏感發作。Kevin 結果當日一整日都要同流鼻水作戰，以Tissue為伴，我好彩D，落左機就冇事。

去到日本，已經係當地四點，攞完行李就去申請JR Pass，20000 yen 一位，話平又得，話貴又得，睇你點睇。今次買既係彈性四日JR Pass，因為我地有兩日不在東京範圍。


買完Pass，Kevin 好醒目咁訂晒所有可以訂既火車飛，咁我地就一定有位坐喇。








搞完一輪，坐Narita Express 出東京喇。全程54分鐘。








出到東京站，已足已鉤起五年前的回憶喇。轉山手線大概搭左24分鐘就到達池袋 (Ikebukuro)。四條友拉住D行李冒住雨行左兩個幾三個字終於到達酒店check-in。

呢間酒店好神奇，日光日白一定唔會搵唔到，不過次次去完夜街返去，我地實搵唔番個門口。奇呢，就係呢一間Sunshine City Prince Hotel。

各自放低行李後，Fiona 要出發去新宿 (Shinjuku)會一會舊友，我同Kevin 伉儷就到上野 (Ueno)諗住食長腳蟹放題，嘿，結果出人意表，間野未執笠，不過冇蟹腳放題je。

佢改左要780 yen 一客，我不如返香港先食。

結果食左個shabu shabu 就算數走人，開頭都諗住去附近D大排檔嘆下，但係一醒起當日係星期五，日本仔大部分係五天工作，人人都會趁星期五出外食餐好。



結果我地搵唔到位，求其行下就返池袋食左個香港唔會食到有咁好味既burger 就去接番Fiona 返酒店。





























Day 1 行程就此結束，好戲在後頭。