狗年前最後一則Blog Post

趁狗年仲未過，決定快快手寫埋呢個post，不過不一次寫可能要過晒假期先寫囉。

如果我冇記錯，對上一次俾人鬧已經係零二年既事囉。咁當然唔包括親朋好友喇，因為佢地鬧我，我覺得佢地係為我好先出聲，因為我唔係聖人，總有做錯左又唔知道既情況出現，其實我感謝佢地關心我添。

講番上次俾人鬧，鬧我既係我既上司，佢鬧我多事，唔應該自己攞左同事既program source 去改。其實整件事係，有某位同事被調到菲律賓工作一個月，咁佢做開的system 好快就要到澳門做demo，而我就係去做demo其中一份子，但係我測試後發覺問題多多，要求上司幫忙。結果得到既回覆係：「哈哈，我都唔識，幫你唔到。我收工先喇，拜科。」到最後當然係我要做到好夜，改好晒D bug，第二日同幾個同事到澳門做demo。上天保祐，demo 成功完成。得到既獎賞就係第二日返到公司俾上司當住所有同事面前鬧左鑊勁，原因得一個，功高蓋主。

早兩日，差唔多既事又降臨我身上，鬧我既係我老死介紹我識既，係老死既其中一位朋友。
鬧我既原因都係好簡單，就係我講左一句同佢做人宗旨背道而馳既說話。原來香港所謂既言論自由真係形同虛設，只要有人講野唔係你心水，請不要留手，鬧佢喇。

呢一件事的確令我有D唔開心，唔開心唔係俾人鬧，係有一刻自己幾乎放鬆對朋友既定義。
我覺得如果將朋友定義得太廣，係一件可怕既事，因為一個識左一個小時既朋友，你係唔會知道佢有冇心害你，幾時要害你。與其常常要我高度戒備，倒不如第一步就將佢擋下來。
今次自己差一點因為同這位過客幾好傾而放棄左自己信守既立場，實在覺得羞愧。

因此，係呢度寫低呢一件事，提醒自己切勿"重複犯錯"。反正我要既好朋友已經係中學同第一份工作既地方搵到，之後仲搵唔搵到，已經不是大問題。因為我已經無憾喇。

情人節！

情人節，好耐都未試過關我事囉，耐到我都唔記得上一次係幾時。

仲記得有個朋友曾經問過我，做乜仲唔拍拖？我覺得佢唔夠清楚IT 呢一行係一行咩既行業。
首先，有幾多女性係鐘意電腦/電玩架？其次，有幾多女性可以話自己D logic 好好？
第三，有邊個女性覺得自己個樣可以見得人，而又鐘意收埋自己唔俾人睇架？
如果有，麻煩話聲我知，我即係轉工去結識呢個女仔。

以前做Software house，根本冇時停，日日都OT，唔好話搵時間去識女仔，連同屋企人講多兩句既時間都冇，因為放左工返到去，父母大多瞓左，自己翻熱D飯餸，食完洗埋碗，仲個涼又講瞓覺囉。仲有就係，工作既地方陽盛陰衰，就算有女仔做IT，佢都可能同大傻/魯芬有D親戚關係。唔係話要以貌取人，不過都唔好咁得人驚嗎。好樣D既，已經一早嫁晒人喇，仲等你咩。

不過依家轉左做in house IT，女多過仔好多，希望搵到個喇，事關舊年睇風水條友話我由舊年年底開始會行運，連桃花都有，但係就偏偏冇橫財，你話激唔激氣！？如果連呢D運都係假既，我出年叫佢回水。

係呢一度，祝天下有情人，都開開心心。未有既，就更加之要開開心心，希望大家出年都可以係Blogger 度寫情人節同邊一個過，點樣過喇。

互聯網，你係得既！

唔記得幾時開始，去日本旅遊既其中一個指定動作就係自訂行程。換著係十年前，你唯一可以做既就只有向所謂既"日本通"老友請教，又或者買一本旅遊書。依家就十分方便喇，只要上各大搜尋網站打上你想要去既地點然後click "search"，成千上萬網站就會為你提供無限既資訊。

零三年我同個老友同佢女友去東京，我已經做過一次這類既行程計畫，雖然最後好似唔係好o岩用，因為老友已經有佢自己心目中既行程，而且佢真係一個日本通，不過起碼俾我有一個初部既concept 俾我呢個日本初哥，無論係文化呀，習俗等等。
隔左冇幾耐之後又要再做囉，不過唔係做俾自己，係做俾家姐，因為佢又係去東京玩呀。

到最近我家姐去大阪玩，當然呢個重責又落o係我身上，不過今次我覺得比之前都易搵資料，可能呢D就係WEB 2.0 既威力喇。

隨著資訊既發展，互聯網真係提供唔少方便俾我地，一次台灣地震就令我地明白到缺少左互聯網既生活有幾慘。如果話MS始創人阿Bill 係偉大既人之一，咁樣發明互聯網既人一定俾佢更加偉大。

唔知第時會唔會發展到除左有必要之前，其他時間大家返工返學都係可以留o係屋企呢。

私房菜

上星期日去左旺角先達果頭食私房菜。九個人都係食左千一蚊落樓，係我食過暫時食過最平既地方。

先講地方，同一般私房菜冇乜大分別，都係一D住家咁既地方放左兩三張枱咁。當係人地屋企就冇問題。
其實私房菜最主要係食物呢，全晚其實都係以上海菜為主，不過我個人認為呢間可以再去食既原因係，佢真係一D味精都冇落到，因為食左成晚由七點半食到走時十點九，我感覺唔到有食完味精既感覺，呢點我真係最欣賞，我出左名皇帝脷，我對食物味道好敏感架。
有三幾個菜我覺得我會再去食，第一個係鹹蛋黃煎蝦碌，炒得好好食。我連蝦殼都食埋落肚，你就知有幾好食。
第二個係酥炸軟殼蟹，千祁唔好以為係你去食日本野細細隻果D size，我可以話你知，唔計D腳，成個飯碗可以遮晒，又炸到外面脆入面juicy，總之yummy喇。
第三個係湯，猴頭菇燉雞，我飲唔到有落鹽，不過啖湯真係好好味。
其實其他都好好食，連D炒菜都好味，因為我地九個人食十一個餸都食得晒，不過唔打算係呢一度逐樣講囉，不過下次再去會試佢D鐵版菜式，因為隔離枱上菜時真係好鬼香。呀唔記得講，仲有甜點，糖水同果盤送添。真係抵食。

如果有朋友想知間野係邊，可以留低message 俾我，又或者email 我喇。我唔打盤係呢度幫人賣廣告。
如果要要食，真係要早少少book 位，最好俾D buffer 人地有七日就好喇。

無題

嘩打開一睇，原來已經成個幾月冇update 過喇，真係懶。
係呀，因為十二月頭開始返新工實在令我身心俱疲呢！呢種感覺真係初初畢業出黎做野時先試過，果一陣返九放十，係放晚十點呀，其間仲可能要落site做野。
今次呢份有D唔同，放工暫時最遲都係七點幾，不過疲倦既原因係返工呢段時間係不停咁有野做，冇得停下手。
又或者可能有人會話，乜你咁屎架！？係囉我都覺得奇，不過諗深一層，我可能真係老了，而且老了十歲添。
早一排參加左中學級社搞既10+周年聚會，見回一聚舊隊友，當然在場唔少得李察博喇！不過我同佢就俾其他舊同學見得多D。食完餐飯，個結論係D女同學冇乜點變，可能女士們都懂得打扮保養喇，但係D男同學就由我識時既死靚仔變左做麻甩佬囉。不過最神奇既係AL時既physics 老師既然一D都冇老到，個樣一樣咁young，我開始懷疑佢係麟伯D fd，佢地約埋一齊去打針。